عيد الميلاد على مسرح المدرسة

الصفّ الأساسيّ الثّاني

تأليف: الآنسة ماري القصيفي
تدريب التلاميذ: السيّدة زينة ناضر - الآنسة نانسي حنّا

1- ما تِنْسوا يا وْلاد بِعَجْقِة العْياد كيف بِكونْ العيد.
2- منّو عالشّجْرَة العيد لا مْخَبّا بِهْدِيّة وْلا بْزينهِ مِضْويِه
3- مَنّو بْفِستان جْديد وْلا بْكَنْزِه شَتَوِيّه
4- بِالْفَرَح الحُبّ الْعيد بِقْلوب نَقِيّه
5- بِعْيونْ عَمْ تِلْمَعْ حْكايات سِحْرِيّه
6- ما تِنْسوا يا وْلاد بِعَجْقِة العْياد كيف بِكونْ العيد
7-العيد هُوّي النّاس يَلاّ تَنْحِبّ النّاس
8-نِحْكي الجِدّ الخِتْيارْ وِنِسْمَعْ شو عِنْدُه خْبارْ
9- نِمْسُكْ إيدْ المَوْجوعْ نْصَلّي تَيْفِلّ الجوعْ
10- نِشْكُرْ الله الحَنّان وْنُطْلُبْ يِحْمي لِبْنانْ
11- تَنِبْقى نْعَيِّدْ هَالعيد بِمْحَبّه وْخَيْر وإيمانْ.

****************************

الصفّ الأساسيّ الثالث

تأليف: الآنسة ماري القصيفي

تدريب التلاميذ: الآنسة نانسي حنّا - الآنسة بولين العلم (البديلة المؤقّتة عن السيّدة هالة خوري المتغيّبة بسبب الولادة)

الاشخاص: مريم – يوسف – الرعيان – المجوس

1-جينا نِزَيِّن هَالشَجْــرَة / ونْهَنّـي الإمّ الـْعَّـذرا
2- مَجوس مْلوك وِرعيان/ جينـا بِسِرْعـة يا إِخوان
3- قالوا وِلِد طِفْلْ زغيـر/ رْكَضْنا وِوْصِـلنا بَكِّيـر
4- حِمْلت الشَّمْس بِإِيدَييِ/ وِجِبْتِـلو يـاها هـِديِّة
5- اللَّوْن الأَزْرَقْ بِعْيوني/ عِمِلْتِلّو شريطَة وَمَجْنونةِ
6- جِبْتِلُّو الطابِة الْحَمْـرا / عَمْ تِلْمَـعْ مِتـْلِ الْجَمْرا
7-اللَّوْن أَلاخْضَرْ يا أَحْبَاب / للِطـابِة الّلـي فَوْقِ الْبابْ
8-واللَّوْن اللّي فِضِّي صار / عَصْفورْ وَبَعْدو ما طَـار
9- وَهَـيْ الطـابةِ الذَهَبِيّة / مــا بِتْخَتْيـرْ صَبِيـّة
10- والطـابةِ اللَّيْمـونِيّة / بِتِتـْرَقـْوَصْ بِـخِفِيّـة
11- وَهَيْدي طابة مَهْضومِـة / مَبْسوطة ومِش مَهمومِـة
12- وَهَيْدي شْريطة غَريبـةِ / مَعْهـا الْفَـرحَة قَريبِـة
13- وَهيدا مَلاك مِن الـرَبْ / يَلّـلي بيسـامِحْ وِيحِـبّْ
14- وَهَيدي النِّجْمِة الْعَمْ تِلْمَعْ / وَأَخْبـار النـاس بْتِسْمَعْ
15-وَهَيدا الراعي الكانْ غافي / راكِـضْ بْسِرْعَة وْحافي
16- وَهيدا الراعي الْكانْ سِهْرانْ / فَكّـَرْ حَالو كان سِهيـانْ
17- وَهيدا الّلي مَعو خَروفْ / قَلبو عَمْ يُضْرُبْ مَلْهـوف
18- وَهيدا عَـمْ يِسْأَلْ مَرْيَمْ / واعـي وَلاَّ عَـمْ بِحْلَـمْ
18- وَهيدا الخَروفْ الدِفْيانْ / عَـمْ بِيِنْفُـّخْ مِشْ فِهْمَانْ
20- واْلبَقْرَة تْحَرِّكْ راسـا / وِيْصيروا يْدِقّوا جْراسـا
21- وِثْلاثِة الْمَجـوسْ طَلّوا / حَطّـوا الْهَـدايا وْفَلّـوا
22- واحَدْ كانْ يِسْجُدْ لِلنـار/ هَلـّقْ بِـأَمْـرو مِحْتار
23- والتاني عالِم مَعْروفْ / جايي تَ يَسوعْ يْشـوف
24- والتالِتْ شَاعِرْ فَنـان / أَفْكـارو شْكـال وأَلوانْ
25- الْتلاتي سَجْـدوا لالله / القِـصّـة مَنهـا حايَـلاّ
26-يوسُف كانْ قَلبو فِرْحان / بَسّ راسو مْلَبَّكْ قِلْقــان
27- مـَرْيَمْ كانِت مِهْتَمِّـة / بإبنا وِمـِشْ مِنْهَــمِّـة
28-قالِتْ عا الله التِـدْبـير / إِبْنـي هَلّقْ بَعْدو زْغـير
29- بُكْـرا بِيكْبَر بالقامِـة / وبالْـحِكْمِـة والتَّسـامي
30-رَحْ يِشْفي كِلّ الأوْجاعْ / وِيطَعْمـي كِـلِّ الجِيّاعْ
31-وَرَحْ يِمْسَحْ دَمْعِ المَقْهورْ / وْما يْخَلّلي خَاطِرْ مَكْسور
32- والمَحَبِّة الْخِـلْقِتْ هَوْن / تِكْبَر وِتْمَللـي هَالْـكَوْن
33-هَيـْدي إلكـُنْ عِيديي / مِشْ حِـلْوي هَالخَبْرية؟